............. اخر امل.............
الليل فرش الوجع
ودق في نن عين
الغلابه حلمهم
وسلم المجاريح لكف الله
الليل قطع حبل الأمل
وعلق مشانق عالبيبان
وساب الديابه
تنهش في لحم الميتين
صلب القمر
فوق عالشجر
لم الغناوي ورصها
لما الحدادي تمصها
الليل بيلم الحكاوي ويقصها
ويفرشها على باب القبور
الليل بيكره الابتسامه والسرور
ويحب جدا الشهاده الزور
ويسب ويلعن
لو لمح في الدنيا نور
الليل بينزل بالحرس
راكب فرس
يقفل بيبان الأمنيات
الليل فرض عالدور سكات
ويهز روح الطيبين
ويسيب فرحهم في العرق
زي العجين
الليل بيفرش في الغناوي
فوق كفوف السكرانين
ويهد حلم اللي اختشوا
طول السنين
يستنوا صبح يشدهم
من قلب طين
.........................
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق