🌹🌹ايوه هقدر🌹🌹 بقلم الشاعر هاني غريب

 🌹🌹ايوه هقدر🌹🌹

قولتيلي على بعدي
مش هتقدر
وعلى بعدي شويه فكر
هو عشان القلب عشقك
يقوم يتكدر
لا مش انا اللي اقبل مهانه
ولو فكرتي شويه
هتلاقيني نسيت
وحبك من جوايا اتسرسب
حبه حبه
زي الميه في كف الأيد
بعد ما كانت مليانه
تبقي انتي اللي وجعاني
وتجيبي اللوم عليا
عمرك ما اعترفتي
انك غلطانه
كنت فاكرك ملاك
طلعتي شيطانه
وراهنت نفسي على بعدك
اه في الأول كنت بعاند
اني اشق قلبي وبراه احدفك
بعد دا كله تفتكري
انه هيعشقك
وانتي اللي جرحاه
انا قلبي مش خفيف
ابيض معدنه نضيف
بس انتي اللي مش عرفاه
انا قلبي مش لعبه
وسط كراكيبك حطاه
انا قلبي حتة ماس
غالي قوي ما بينداس
ولا بسهوله يتكسر
ولو قابلني حب تاني
هفكر
وههدي قلبي بأيدي
للي يعرف قيمته و يقدر
اديتك مليون فرصه
حاسستك انك في السما نجمه
مش اي ايد تطولك
اخدتي في نفسك قلم
وركبك حصان غرورك
وافتكرتي انك بأشاره واحده
هتترمي كل القلوب
في بحورك
بقى بالذمه هو ده
في الحياه دورك
غرورك خلاكي غلبانه
وعليكي قولت يالا السلامه
دا انا قلبي لو اتوجع
هتكوني انتي الندمانه
اوعو تفتكرو ان اللي
قلبه انكسر انا
دي قصه خيبانه
خطرت في بالي
جر القلم حبره
على صفحه بهتانه
هكتبها وتحتها ١٠٠ خط
اصل اصعب حاجه
في الدنيا الخيانه
بقلمي / هاني غريب