قصيدة ( مرض السكر ) عامية
ملعون مرض السكر
تيجي تظبطه يتعكر
ممنوع تتعصب تغضب
أو حتي بعقلك تفكر
يروح طالع علي طول
خد دواك إوعى تتأخر
و لما تاكل أكل خفيف
ينزل بسرعة و يتنكر
طب نعمل معاه أيه
مهو سكن الجسم و عسكر
و لو عاوز أكله دسمه
تروح تتمشي و تتمختر
تجيله يمين يجي شمال
مهو جد مش بيهزر
و ينصحوك متخفش منه
و خليك جامد و لا تتأثر
طب إزاي دا لما ينزل
رعشه و العرق بيمطر
و لما يعلى شبوره
و العين ما بتشوف و لا تنظر
و لما تحب تاكل بسبوسه
أو هريسة و تتمنظر
تبقى ليله جميله
و لفعلك سكرك يتنكر
يعاقبك على طول بغيبوبه
و يقولك أنا موجود مش تتذكر
و المصيبه الكبرى يا اخونا
يلف ع الجسم و يهكر
أي عضو يقدر عليه
يهجم عليه بسرعه و يكسر
و لو حاول عضو الهروب
يقف له و عن أنيابه يكشر
تحصله هزه علي طول
و يقع م الخضه متحسر
و معاه يعلى الضغط
مش عارف ليه متفسر
لازم حاجه تانيه معاه
قعدته لوحده هتخسر
ربي راضين بقضائك
فاجزنا خيرا يوم المحشر
و اشف يا رب كل مريض
و ارحم يا مولانا و اغفر
بقلم /// أسامة ااحكيم - مصر
فعلا أحسنت القول والوصف
ردحذف