____ ابويا سندي وضهري _____
ابويا سندي وضهري
وعلمني الرجوله من صغري
وحرم نفسه وسقاني
وبعمره يحووط علي عمري
شقي السنين عشاني
داق المر من كيعاني
إتحملنى بكل المعاني
وبقا يسقي صبره من صبري
قساوته عليا حنان
وراحتي في أحضانه
وكان ليه واحة أمان
والشهد كان في لسانه
كان الدرع اللي بيدافع عني
كان السيف اللي بيحميني
فرحته يشوفني متهني
وبشالة كان يلفني ويدفيني
وياخدني الجامع أصلي
وفرحته بيا ترويني
وفي الشمس كان ضلي
ولو قلت اه يداويني
ابويا كان سندي وضهري
ونصايحه كانت تغذيني
وعمره ما خيب خاطري
وكان نفسي أديله سنيني
شقي كتير عشان مهري
وكان نفسه أحقق أمانيه
ورحل عن حياتي بدري
وقريت الرساله في عينيه
خلاص ابويا سابني لوحدي
وفي الدنيا مش ح لاقيه
سيرته ح رويها لولدي
والف رحمة ونور عليه
___________________________
............ حسن الشوان ...............
ليست هناك تعليقات:
إرسال تعليق