آخر الكلام
(عامية)
للناس إلي تحب الكلمة
ننثر وردي ألوان ألوان
للناس إلي تحب النغمة
نزيد نعدّل في الميزان
للناس إلي قلوبها بيضا
نغرس شجرة في البستان
كي نتكلّم تضوي شمعة
و يميل حذايا الميزان
متعدي نلقاها ظلمة
يدلل عالحطبة مرجان
إلي يقود في فرسة عمشة
طاحونة بلاشي دندان
حبيبي كي تفرق للقاب
تحزّم و أشطح في الميدان
هاهي التقريطة من عندي
و أنت خلط إنس و جان
كي تعبا دلوك يا حبيب
بدّل لعراوي حنان
آخر دورة في ها الخيمة
لجرح لا تعفّن ينتان
و أنا عندي حساسية
ملي يوشوش في لوذان
توا نخليكم يا سادة
تمت رسالة لحزان
للناس إلي تحب الشهرة
قداش تحبو العدّان
مستانس ديما متعدي
ما نطولشي مع العميان
الضرير موشي أعمى
لعمى أنت يا إنسان
كي تغلط في خلق الله
و تسمي السارق فنان
خارج من كرشك يا بيه
برى جيب فرخ حصان
الهاشمي البلعزي
في
04/03/2021
ليست هناك تعليقات:
إرسال تعليق