فى الدنيا غرايب كتيرة.
لكن حياتى أنا أغرب.
بقالى سنين و سنين
فى بحور التوهة متغرب.
و حاولت كتير أرسى على شط
و لسه مش عارف.
و كل ما أنوى أرجع المينا
أتردد و ألاقى نفسى خايف.
و أرجع أقنع نفسى و أقول
إن كان إمبارح ضاع.
و النهاردة هوا ده حالى.
لسه بكرا جاى.
و أقدر أحقق فيه كل آمالى.
و أرجع تانى أقول
خايف من إللى هأقابلهم على الشطوط.
بيقولوا على نفسهم بنيآدمين
و هما وحوش ظالمين
بيكدبوا على بعض.
و يسرقوا من بعض.
و يقتلوا بعض.
و يقوللك مستغرب ليه.
ما الدنيا على حالها.
من أيام قابيل و هابيل.
لا فيه جديد فى الفعل
و لا فيه جديد فى المفاعيل.
يا رب
يا أرحم الراحمين.
ضلل علينا برحمتك.
و عوض لينا
شقا السنين.
و المس إنت بإيدك
قلوب البنيآدمين.
رجعهم تانى
بأفعالهم ..لوجودك مصدقين.
على دربك ماشيين.
رجعهم يصدقوا بصحيح
انهم مهما طال العمر.
و مهما زادت القوة.
و مهما زادت العزوة.
ليك فى يوم راجعين.
راجعين فاضيين
زى ما دخلوها فاضيين.
و إنك حرمت الظلم على نفسك.
يا ترى هيجايبوا عليك
يقولوا إيه بأه الظالمين.
عجوز غاوى شعر
مرقص اقلاديوس
ليست هناك تعليقات:
إرسال تعليق