مسرح العرائس ،،،، بقلم الشاعر عبد الله السايح

،،،،،(مسرح العرائس )،،،،،،
محتاجني ليه عروسه
بإيديك ترقصني
بغرامي مهوسه
وعينيك تلخصني
لو لحظة موكوسه
بإيه هتحرصني
خلتني ليه كوسه
م الحبل خلصني
حتى في البوسه
بالأمر بتبوسني
خلتني ملبوسه
عفريت وبيدوسني
على مسرحك بوصه
واحبال ماتنصفني
العقل بقى بوظه
ولامرة تنصحني
شخصية محفوظه
من فكري تمسحني
صعب اللجام علم
وتشده يدبحني
من غير مااتكلم
عمال تمرجحني
من يوم ماليك سلم
القلب وفضحني
بإيديك وبتيتم
والحبل يجرحني
حتى اللجام بَلِّم
والعمر ريحني
قلبي يتيمم
شمس الصحر محمي
ليه عمري بتسمم
ساحبني ليه محني
وعينيه ليه تكمم
والعشق رابحني
وف يوم هتتألم
لو حد سوحني
يومها ماهتسلم
خسران ماتنفعني
كفاياك بقى تحزم
كفاياك ترقصني
أصل الغرام قَسِم
أحكام بتنصفني
خليك بقى معلم
بالحب إرصفني
،،،،،،(شعر)،،،،،،،،،
عبد الله السايح