(بهية)
مصر يا بهية
شيفاكي حلوة في عينيا
طب ماأنتي أم الدنيا ديه
شيفاكي عروسة بالألوان
نصها جناين وغيطان
والنص التاني
تاريخ بيحكي نفسه من زماان علي الجدران
مصر يابهية شيفاكي حلوة في عينيا
لم أقول نيل وبحرين
يبقا مراكب بشراعها وفيها صيادين
وأحكي ياعمي علي الصيادين في مدن القنال
ياااه ده ليها حكاوي وقصص من زمان
لم نقول القنال
يبقا السويس والإسماعلية وبور سعيد
وأفضل أسمع منه تاني وأقوله عيد
حكاوي يشيب لها الولدان
ولكنها تعلمني وتعرفني زمان الشجعان
مصر يابهية شيفاكي حلوة في عينيا
وأضرب ياعمي علي المزمار أحلي موال
وأنا جنبك متسلطن علي صوت الناي
أسمع حكاوي الصعيد
تعلم فيك الرجولة وتخلي قلبك حديد
تعرفك أجدادك اللي هنا
في أسوان وسوهاج ولأقصر وقنا
تقولك أنا التاريخ
أفتخر بيا بس متنساش تصنع الصواريخ
أصنع المستقبل وبلاش كلام فاضي
لازم يكون ليك حاضر زي ما ليك ماضي
مصر يابهية شيفاكي حلوة في عينيا
لحظه سكوت وأنا بتكلم عن سيناء
لحظه عبور مكتوبة بأسامينا
لافي يوم هننسا ولا الزمان هينسينا
وهنفضل نقول سيناء رجعت كاملة لينا
هي دي كل آمالينا
حبيبتي هي الفرحة اللي في عينينا
ايوة سيناء يابهية
حتة منك يامصرية
وحياة الدمعة اللي في عينيا
بنحبك يامصر
ياأم الدنيا ديه
مصر يا بهية شيفاكي حلوة في عينيا
بقلم
دعاء_أحمد
ليست هناك تعليقات:
إرسال تعليق