قاعد باكتب فى البلكونه ...
كلمه ف جـُمله تكون مفهومه ...
تبقى نصيحه لناس مهمومه...
كلمه وعند الناس مضمونه...
..................................
منها القلب القاسى يحـِن ّ ...
إن كان إنسى أو كان جـِنّ...
ومايبقاش م الهمّ يئن ّ...
أو م الو ِحده لوحده يرنّ...
..................................
كل الناس محتاجه الكلمه ...
يبدلوا هم ّ وغمّ بغنوه...
وانا مغمور فى الوحده بافنـّن...
لازم حرفى ف شكله يقنن...
.................................
أسمع كلمه وصـَعبه الكلمه...
(إثبت ياااه...؟؟؟إثبت يااااه...)
كلمه بجد ياصاحبى قبيحه ...
أيوه سامعها ف ودنى صريحه...
........................................
(إثبت يااااه ؟؟؟إثبت ياااااه...؟)
راح الشـِعر وطار على طول ...
واختفى منـّى انا مش مسطول ...
فين الشـِعر اللى هيستنـّى...
لـَمـَّا هيسمع إثبت يااه...
.................................
قومت وقفت انا فى البلكونه ...
كده كام شاب وزايمين زومه ...
قول قال إيه ياحبيبى وصاحبى ...
بيقلـّدوا عـَمـَّك رمضان..؟
..................................
مين رمضان ..؟
أصل ده فيلم الناس شايفينه ...
والشـُبـَّان دايما ً فاهمينه ...
بـَد َل الدرس ياناس حافظينه ...
..................................
(إثبت ياااه...؟)
فين الفـَنّ ياعـَمّ ياسـُبكى ...
خايف بـُكره أشوفك تبكى...
الناس ماسكه ف سيرتك تحكى ...
والأ ُدباء من فـَنـَّك تشكى ...
.....................................
أصل الفـَنّ ياسيدنا رساله...
تنتج فـِكر بأحلى مهاره...
ويـّا نصايح فيها تصالـُح ...
يبقى الفنّ ف أحلى إداره...
................................
فين إحسان عبد القدوس...
ليه عايزين الشعب تيوس...
بـِـِعنا كثير وكثير فى مـَبادىء...
نفسنا نـِعرف مين البادىء...
..................................
يوصل فـَنـّك على باب بيتى ...
ف قلب دروبنا وحتـّى ف غـِيطى ...
قاعد وحدى انا فى البلكونه ...
باكتب شـِعرى وكـُلـِّى مرونه...
..................................
يهرب قامى وسـَطرى وشـِعرى ...
علشان كلمة إثبت ياااه...؟
ياو ِلـْداه ...ياو ِلـْداه
ليست هناك تعليقات:
إرسال تعليق