فيه ناس مش فاهمه كلامي للشاعر محمد ضباشة

فيه ناس مش فاهمه كلامــي
ولا حتي بتعرف تقراه
ولا راكبه علي حصان أحلامي
ولا عايشـه بغلبها وياه
ولا حست بكابوس في منامي
فكـرهـت لياليا معــاه
ولا فتحت صفحات أيامي
ولا عاشت بالظلم حياة
وكل الشاهد صورة أمامي
كل عيونها بتنزف أه
أه لو تيجي في يوم قدامي
كنت تلاقي حروف رسماه
هو وجرح الوجع الدامي
لغلابة عايشين في هواه
علي حيطانهم تلقي أسامي
تيجي وترحل ويا بكاه
أو مع فاسد ولا حرامي
ولا ما قادر علي بلواه
جوه السطر تلاقي معاني
اللي تصادفه يقول الله
واللي تناكفه ما يقري التاني
ما هو بيخبط علي ليلاه
واللي ما ينقذ ناس بتعاني
تبقي حروفه تبات جواه
ولا تبقي أبياته أماني
ولا صرخة تكتبها يداه
ولا شاعر عايش في الواقع
وعيونها دايما ملكاه
يتغزل في الحسن المانع
وبقلمه تلقاها شداه
وهو بحرفه دايما قانع
أن مرايته ما شايفه سواه
-------------
فيه ناس
الشاعر محمدضباشه